ബഹ്‌റൈനിൽ ഈ വര്‍ഷത്തെ ഹജ്ജ് തീര്‍ത്ഥാടനത്തിനുള്ള രജിസ്‌ട്രേഷന്‍ ആരംഭിച്ചു
മനാമ: ഈ വര്‍ഷത്തെ ഹജ്ജ് തീര്‍ത്ഥാടനത്തിനുള്ള രജിസ്‌ട്രേഷന്‍ നടപടികള്‍ ബഹ്‌റൈന്‍ ആരംഭിച്ചു. രജിസ്റ്റര്‍ ചെയ്യാനുള്ള സമയപരിധി മെയ് 29 വരെയാണ്. ബഹ്‌റൈന്‍ നീതിന്യായ, ഇസ്ലാമികകാര്യ വഖാഫ് മന്ത്രാലയത്തിനു കീഴിലെ ഹജ്ജ്, ഉംറ വിഭാഗമാണ് ഇതുസംബന്ധിച്ച റിപ്പോർട്ട് പുറത്തുവിട്ടത്.
തീർത്ഥാടകർക്ക് രാജ്യത്തെ അംഗീകൃത ഹജ്ജ് ഗ്രൂപ്പുകള്‍ വഴി രജിസ്റ്റര്‍ ചെയ്യാം. ബഹ്‌റൈന്‍ സ്വദേശികളുമായി അടുത്ത കുടുംബ ബന്ധമുള്ള ഏഴ് വിദേശികളെ ഹജ്ജ് ഗ്രൂപ്പില്‍ ഉള്‍പ്പെടുത്താനും അനുവാദമുണ്ട്. ഇതേ നിയമം പാലിച്ചുകൊണ്ട് ഗള്‍ഫ് കോപ്പറേറ്റീവ് കൗണ്‍സില്‍ അംഗങ്ങളായ രാജ്യങ്ങളിലെ പൗരന്‍മാര്‍ക്കും രജിസ്റ്റര്‍ ചെയ്യാവുന്നതാണ്.
ഇതിനിടയിൽ സൗദിയില്‍ ഹജ്ജ് നിര്‍വ്വഹിക്കുന്നതിനുള്ള വിവിധ സേവനങ്ങള്‍ക്ക് ചെലവ് വരുന്ന തുക 550 ദിനാറായി കുറച്ചു. ഇത് കഴിഞ്ഞ വര്‍ഷം 650 ദിനാറായിരുന്നു. മാത്രമല്ല കൂടുതല്‍ തീര്‍ത്ഥാടകരെ രാജ്യത്തേക്ക് ആകര്‍ഷിക്കുന്നതിന്റെ ഭാഗമായി ഹജ്ജ് നിര്‍വ്വഹിക്കുന്നതിന് നിലനിന്നിരുന്ന നിയന്ത്രണങ്ങളില്‍ ഇളവ് വരുത്തിയിട്ടുണ്ട്. ഇതിൽ വനിതാ തീര്‍ത്ഥാടകരോടൊപ്പം രക്തബന്ധമുള്ള പുരുഷ ഗാര്‍ഡിയന്‍ വേണമെന്നുള്ള നിബന്ധനയും ഒഴിവാക്കിയിട്ടുണ്ട്.
ബഹ്റൈനികളുമായി അടുത്ത കുടുംബബന്ധമുള്ള ഏഴു വിദേശികൾക്ക് ഓരോ ഹജ്ജ് ഗ്രൂപ്പിലും ഉൾപ്പെടുത്താൻ അനുമതി നൽകിയിട്ടുണ്ട്. ഇതേ നിബന്ധന വെച്ച് ജിസിസി രാജ്യങ്ങളിലുള്ള പൗരന്മാർക്കും രജിസ്റ്റർ ചെയ്യാം. മിനയിലും അറഫയിലും ടെന്റുകളുടെ അളവ് നിർണയിച്ചിട്ടുണ്ട്.
മിനയിൽ ഒരാൾക്ക് ഒരു മീറ്ററിൽ താഴെയും അറഫയിൽ ഒന്നര മീറ്ററുമായിരിക്കും ഉണ്ടാവുക. അതിനാൽ മിനയിലെ രാപ്പാർക്കൽ ഊഴം വെച്ചായിരിക്കും. സുന്നികളിൽനിന്നും ശിയാക്കളിൽനിന്നുമുള്ള ഹജ്ജ് ഗ്രൂപ്പുകൾ പരസ്പരം സഹകരിച്ചാൽ ടെന്റുകളിൽ രണ്ടു മീറ്ററോളം വിസ്തീർണം ഒരാൾക്കു ലഭിക്കുമെന്നും അറിയിച്ചു.
