ദുബായ് ഇന്റർനാഷനൽ ബോട്ട് ഷോ ഇന്ന് മുതൽ ആരംഭിക്കും
ദുബായ്: ദുബായ് ഇന്റർനാഷനൽ ബോട്ട് ഷോ ഇന്ന് മുതൽ അഞ്ചുവരെ. ദുബായ് ഹാർബറിൽ നടക്കുന്ന ബോട്ട് ഷോയിൽ 175 ജലയാനങ്ങൾ അണിനിരക്കുന്നുണ്ട്. ലോകത്തിന്റെ വിവിധ ഭാഗങ്ങളിൽ നിന്നുള്ള 30,000 സന്ദർശകരെയാണ് ഷോയിൽ പ്രതീക്ഷിക്കുന്നത്.
ലോകത്തിലെ ഏറ്റവും വലിയ ബോട്ട് ഷോയിൽ ഒന്നാണ് ദുബായ് ഇന്റർനാഷനൽ ബോട്ട് ഷോ. ലോകപ്രശസ്തമായ ബോട്ടുകളുടെ സംഗമമാണ് ഇവിടെ അരങ്ങേറുന്നത്. ദുബായിലെ ഏറ്റവും പ്രധാനപ്പെട്ട വിനോദ സന്ദർശന കേന്ദ്രം കൂടിയാണ് ദുബായ് ഹാർബർ. ഇവിടെ 700 ബോട്ടുകൾക്കുള്ള സ്ഥലമാണ് സജ്ജീകരിച്ചിരിക്കുന്നത്.
സൂപ്പർ യാനങ്ങൾക്ക് മാത്രമായുള്ള ആദ്യ തീരമാണിത്. പ്രശസ്ത സ്ഥാപനങ്ങളായ അസിമുത്, ഫെറാറ്റി, ഗൾഫ് ക്രാഫ്റ്റ്, പ്രിൻസസ്, സാൻ ലെറെൻസോ, സൺറീഫ്, സൺസീകർ ഗൾഫ് തുടങ്ങിയ സ്ഥാപനങ്ങളുടെ ജലയാനങ്ങൾ ഷോയിൽ അണിനിരക്കും.
10 പുതിയ ബ്രാൻഡുകൾ ഇക്കുറിയുണ്ട്. അബെകിങ് ആൻഡ് റാസ്മുസെൻ, ബോട്ടിക്യൂ യാട്ട്, ഫിൻമാസ്റ്റർ, ഗ്രീൻലൈൻ യാട്ട്, നോർധൻ, സോ കാർബൺ തുടങ്ങിയവ ഇതിൽ ഉൾപ്പെടുന്നു. പുതിയ യാനങ്ങളുടെ ലോഞ്ചിങ്ങിനും ബോട്ട് ഷോ സാക്ഷ്യം വഹിക്കും.
കൂടാതെ 50 ഓളം ആഗോള സ്ഥാപനങ്ങളുടെ പുതിയ പ്രഖ്യാപനങ്ങളും നടക്കും. ആഡംബര യാനങ്ങളും ഇവിടെ കാണാം. ലോകത്തിലെ സൂപ്പർ യാനങ്ങളുടെ ഉടമകളിൽ നല്ലൊരു ശതമാനവും മിഡിൽ ഈസ്റ്റിലാണ്. നിരവധി യാനങ്ങൾ ഈ അഞ്ച് ദിവസത്തിനിടെ നീറ്റിലിറക്കും.
ചെറിയ മത്സ്യബന്ധന ബോട്ടുകളുമുണ്ടാകും. ജലഗതാഗത മേഖലയിലെ നൂതന ആശയങ്ങളുടെയും കണ്ടുപിടിത്തങ്ങളുടെയും പ്രദർശനം കൂടിയായിരിക്കും ഇത്. കപ്പിത്താന്മാർ, കപ്പൽ ഉടമകൾ, സാങ്കേതിക വിദഗ്ധർ തുടങ്ങിയവർ പങ്കെടുക്കും. ലോകത്തിലെ ഏറ്റവും മികച്ച 10 നോട്ടിക്കൽ തലസ്ഥാനങ്ങളിൽ ഒന്നാണ് ദുബായ്. 15 മറീനകളിലായി 3000 ബോട്ടുകൾ ദുബായിലുടനീളമുണ്ടെന്നാണ് കണക്കുകൾ.
